ඉතිහාසය

ඉදිරිපස වෙල් යායකින් සහ ගලා බසින දිහදහරකින්ද, පිටුපසින් ගුරුගොඩැල්ල කදු වැටියද, වම්පසින් තුරුලතා ගහණ පරිසරයකින් මැදිව ගුරුගොඩැල්ල වීරසිංහ විද්‍යාලය පිහිටා ඇත.

වර්ෂ 1979  ජනවාරි මස  20  වන දින එකවට තංගල්ල ආසනයේ මහජන මන්ත්‍රීව සිට දිවංගත ජිනදාස වීරසිංහ මැතිතුමාගේ මග පෙන්වීම මත ගුරුගොඩැල්ල හා අතපත්තුගම ගම්වාසීන්ද ගංගා නිම්න සංවර්ධන මණ්ඩලයේ නිළධාරීන්ද එක්ව තැනු 80*20 ගොඩනැගිල්ලක පාසල ආරම්භ කර ඇත. එදින පෙ.ව. 10.37 ට යෙදුන සුභ නැකතින් තංගල්ල ප්‍රාදේශිය අධ්‍යාපන අධ්‍යක්ෂක සී.ටී.එම්. ප්‍රනාන්දු මැතිතුමා, මාණ්ඩලික අධ්‍යාපන නිළධාරීතුමා ග.නි.ස.ම නිළධාරින් සහ ප්‍රදේශවාසීන්ගේ සහභාගිත්වය ඇතිව පැවැති උත්සවයකදී මහජන මන්ත්‍රී ගරු ජිනදාස වීරසිංහ මැතිතුමා සහ එම මැතිනිය විසින් පාසල විවෘත කර ඇත. එතුමා විදුහල ආරම්භ කිරීමට දැරූ උත්සහයකට උපහාර කිරීමක් වශයෙන් ගුරුගොඩැල්ල වීරසිංහ නම්න් පාසල ලියාපදිංචි කරන ලදී.පාසල ආරම්භ කල දින එතුමා විසින් තබන ලද මංගල ලොග් සටහන් පිටපතින් එතුමා තුළ පැවති අභිප්‍රායන් මොනවද පැහැදිලි වේ. 

ආරම්භක අවස්ථාවේ ශිෂ්‍ය ශිෂ්‍යාවන් 230 ක් පාසලට ඇතුලත්ව ඇත. කොහොඹගස්වැව වැනි පැරණි ගම්මානවල ශිෂ්‍යයනුත් ග.නි.ස.ම මගින් ජනපද ඇති කිරීම නිසා හම්බන්තොට දිස්ත්‍රික්කයේ මෙන්ම කෑගල්ල නුවර ඈත ප්‍රදේශ වලින් ඉඩම් ලැබ පදිංචියට පැමිණි ජනතාවගේ දු දරුවනුත් විශාල සංඛ්‍යාවක් සිටි බැවින් මෙතරම් ශිෂ්‍ය සංඛ්‍යාවක් ඇතුලත් වීමට හේතු වී ඇත. මෙහි ප්‍රථම විදුහල්පති ධුරය දැරුවේ වි. ගුණදාස මහතා වන අතර මේ දක්වා විදුහල්පතිවරුන් 09 දෙනෙක් සේවය කොට ඇත. පාසල ආරම්භ වන විට ගුරුවරු 08 ක් සේවය කොට ඇති අතර වසර අවසන් වන විට එම සංඛ්‍යාව 11 දක්වා වැඩි වී ඇත.

වැඩිවන ශිෂ්දි‍ය අනුපාතයට අනුව 80*20 ගොඩනැගිල්ල ප්‍රමාණවත් නොවු නිසා 1984 දී 30*20 පන්ති කාමරයක් ප්‍රදේශවාසීන් විසින්  පොල් අතු සෙවිලි කොට සාදා ඇති අතර එය 1994 දී ස්ථිර වහළක් සහිතව සාදා ඇත. 1992 දී 80*20 ගොඩනැගිල්ලක්ද 1994 දි බහුකාර්ය ඒකකයක්ද සාදා ඇත. 1980 දී ග.නි.ස.ම මගින් ඔවුනට අයත් ගොඩනැගිලි 03 ක් ගුරු නිවාස සදහා පවරා ඇත.පාසලේ අතීතයේ සිටම තේක්ක, ගං කොහොඹ , ඇහැළ, ඇකේෂියා, බෝ, අරලිය වැනි ගස් වර්ග වලින් පෝෂිතව තිබු අතර මධ්‍යම පරිසර අධිකාරිය මගින් වන වගා ව්‍යාපෘතියක්ද ක්‍රියාත්මක කර ඇත.

විදුහල ඇරඹී දැනට වසර 36 කි. විදුහල ආරම්භයේ සිටි ශිෂ්‍ය සංඛ්‍යාව වර්තමානයේදී අඩු වීම කෙරෙහි නිරන්තරයෙන් පැවැති ගුරු හිගය බලපා ඇත.